1 Thessalonians 1
1Mai baahi o Paul, Silas mo Timothy, ang gi digau di nohongo dabu i Thessalonica ala gu hai mee ginai God Tamana mo Tagi go Jesus Christ. aTumaalia mo di noho i di aumaalia gi madalia goodou.
Di mouli mo di hagadonu o digau o Thessalonica
2Gimaadou e danggee hagaamu tumaalia ang gi God i nia madagoaa huogodoo, ge dee modu di madau haga langahia labelaa goodou i lodo madau dalodalo. 3Gimaadou e langahia i mua nnadumada o God Tamana, i di godou hai hegau gi godou hagadonu, mo aloho dela ga hidi ai goodou ga ngalua damana, mo di godou hagamau dangihi goodou i lodo di godou hagadagadagagee gi tadau Dagi go Jesus Christ. 4Madau duaahina nei, gimaadou gu iloo bolo God e aloho i goodou, gei gu hilihili goodou e hai nia dama ni aana. 5Gimaadou gu hagadele adu gi goodou di Longo Humalia, hagalee go nnelekai la hua, mo nia mogobuna o di Hagataalunga Dabu, mo di madau hagadonu dela gu donu humalia. Goodou gu iloo madau mouli i di madau madagoaa nogo noho i godou baahi belee hagahumalia goodou. 6Goodou gu daudali hua gimaadou mo Tagi. Maeaha maa goodou gu tale ang gi di hagaduadua damana, gei goodou gu kae nnelekai aalaa mo di tene dela mai baahi di Hagataalunga Dabu. b 7Gei goodou gu daudali go digau o Macedonia mo Achaia ala gu hagadonu. 8Nnelekai o Tagi aanei ne hidi mai godou baahi ala gu modoho gi daha gi Macedonia mo Achaia, gei di longo o di godou hagadonu a God gu dele labelaa gi nia gowaa huogodoo. Deelaa laa, gimaadou e dee tau loo di leelee i di mee deenei. 9nia daangada huogodoo gu hagabooboo i di godou hagalaamua gimaadou i di madau lloo adu gi godou baahi, mo di godou huli gi daha mo nia balu god gi God, bolo goodou e daumaha hua gi God Mouli dela e donu, 10mo di godou talitali di hanimoi o dana Dama madua i di langi. Dana Dama madua go Jesus dela ne haga mouli aga go meemai i dono made, gei dela e haga dagaloaha gidaadou gi daha mo di hagawelewele a God dela ga dau mai.
Copyright information for
KPG